Sunnubraut 46

Miklaborg og Jón Rafn fasteignasali kynna Sunnubraut 46 í Kópavogi – einstakt heimili sem kemur afar sjaldan á markað.

Húsið stendur hátt á fallegri hornlóð og nýtur tilkomumikils útsýnis. Það var teiknað af Guðmundi Þór Pálssyni, einum áhrifamesta arkitekt sjöunda áratugarins, sem lét eftir sig fjölda opinberra bygginga og merkilegra einbýlishúsa.

Sunnubraut 46 ber greinileg einkenni hans: skörp form, háir skjólveggir, stórir gluggar og hugvitssamlegt flæði birtu. Húsið er sterkt í nærveru, karakter og stíl – raunverulegt listaverk modernismans.

Aðeins einkaskoðanir í boði. Vinsamlegast hafið samband við Jón Rafn fasteignasala í síma 6955520 eða sendið póst á jon@miklaborg.is

Húsið stallast fallega innbyrðis, sem gerir flæði á milli eldhúss, borðstofu og þvottahúss mjúkt og átakalaust. Í takt við tímann þegar húsið var byggt voru mörg svefnherbergi á fyrstu hæð, en núverandi eigendur hafa breytt þessu og skapað stærra alrými.

Miklar endurbætur hafa verið gerðar, þó ávallt í takt við karakter og tíðaranda hússins. 

Komið er inn í fallegt anddyri en gólfhiti er í öllum gólfum á neðri og efri hæð, utan hjónaherbergis sem er með hefðbundnum ofnum.

Neðri hæðin er með heilsteyptum terrazo-flísum sem slípaðar eru á staðnum og settar í álramma, en á efri hæðinni er náttúrusteinn ásamt gegnheilu parketi.

Neðri hæðin hefur áður hýst fimm svefnherbergi, en þrjú þeirra hafa verið sameinuð í rúmgott alrými. Eitt þeirra er nýtt sem skrifstofa í dag. Einnig er þar baðherbergi með sturtu, miklir forstofuskápar ásamt geymslum og innangengt er í bílskúrinn. 

Fallegur stigi leiðir upp á efri hæðina þar sem stórar og bjartar stofur taka við. Í stofunni er höfugur arinn, sem er miðpunktur rýmisins, fullkominn til að skapa hlýleika. Útgengt er úr stofunni á stórar útsýnissvalir sem liggja meðfram húsinu að framan, þar sem einstakt útsýni yfir voginn og til Reykjaness nýtur sín til fulls. Þær bjóða upp á fullkomið rými til að njóta bæði dagsins og náttúrunnar, hvort sem það er á miðjum degi eða á kvöldin með sólarlaginu. Einnig er á austurhlið hússins notaleg verönd, þar sem morgunsólin baðar svæðið. Það er tilvalinn staður fyrir kaffibolla og að byrja daginn í ró og næði.

Allir gluggar hússins hafa verið endurnýjaðir með vönduðum hætti, sem undirstrikar vel viðhaldið á húsinu. Bulthaup eldhúsinnrétting með Gaggenau og Sub-Zero tækjum prýðir eldhúsið. Þar er mikið skápapláss og beint útgengi í bakgarð, þar sem gengið er upp á verönd. Allar stéttar utan húss og heimreið eru upphitaðar, sem auðveldar alla umhirðu á köldustu dögum ársins.

Húsið hefur verið endurbætt með virðingu fyrir upprunalegum stíl þess og er í góðu ástandi. Að auki er rúmgóður garður umhverfis húsið með stæði fyrir nokkra bíla. Göngu- og hlaupaleiðir um Kársnesið gera þetta svæði bæði eftirsóknarvert og fjölskylduvænt.

Einstök eign sem á sér fáa líka. 

Nánari upplýsingar veitir Jón Rafn fasteignasali í síma 695-5520 eða jon@miklaborg.is